تعالو نشوف مين حنكش ومين كرشة
أ بطالنا ... حنكش ... ( عبد الحكيم ) وكرشة ... ( كرم ) طلبه جامعيين فاشلين
كغيرهم من بعض شباب هذة الايام .... من اسر طيبة متدينه – ينتمى ابطالنا لشله فاسدة
همها الاول والاخير هو قضاء اوقات يعتقدون انها سعيدة بعيدا عن مزاولة الاهل والدراسه ...
دلوقتى الامتحانات على الابواب .... دار الحوار التالى ...
حنكش: واد يا كرشة ايه الحوار ؟
كرشة: كرشة ( مسطول ) حوار ايه ماهو زى العسل اهو ؟
حنكش: فوق كدا وقولى هنعمل ايه فى حوار الامتحان؟
كرشة: ولا حاجة هنسقط
حنكش: يخربيتك ... ما انا عارف بس ايه الاسباب .... التيرم اللى فات تهمتها فى ان
اللى بياخدوا كورسات بس هما اللى بينجحوا
وابويا وامى عملوا جمعية عشان الكورسات . وكنت باخد الفلوس ونروق بيها كلنا
كرشة: وبعدين فى الذل دة ؟ السنه اللى جاية انا الحوار دة .... احنا عندنا كام مادة ؟
حنكش: ست مواد ... شوف انا حضرت حوار لاربع مواد وعليك انت المادتين الباقيين .
كرشة: قول اشجينى
حنكش: اول يوم هقولوهم ان انا متوتر وتعبان وان المادة دى مش جاهز لها
والجدول عاملين فيه المادة دى قبل اللى بعدها بيوم
عشان انا شايلها من السنه اللى فاتت فانا مش هدخلها وامتحنها فى الدور التانى
عشان اركز فى اللى بعدها
كرشة: حلو .. حلو اوى واللى بعدها ( يشد نفس من الشيشة )
حنكش: المادة اللى بعدها هركز فيها حلو اوى واقعد نموذجى جدا فى البيت
واروح الامتحان الصبح واقولهم يدعولى ..
. وبعدين ارجع اقولهم الامتحان كان( ابن .... ) ومعرفتش احل لا انا ولا زمايلى .
كرشة: تمام حلو اوى ... الحوار التالت بقى ؟
حنكش: هطبق اذاكر ( معاكم طبعا ) وارجع وش الصبح وانزل نموذجى وبردو يدعولى
وارجع اقولهم دخت ونمت فى الامتحان عشان طبقت واعصابى تعبت
كرشة: الله عليك يا حنكش يا عسل ... دة انت مزاج خد لك نفس ... فين الحوار الرابع ....؟
حنكش: الحوار الرابع دة بقى نمرة بس عليك انت بقى يا مجدع تدبرلى حاجة كدا على ذوقك
اخدها على الصبح ودور اسهال وطراش(يع يع الله يقرفك) واعمل بيها المظلوم الغلبان .
كرشة: ولا يهمك اجيبلك دبوس حشيش مغشوش من عند الواد سيكا النتن واديها ....
تطرش وتسهل لتانى يوم (ويقرفك انت كمان)
حنكش: يخرب بيتك يالا .... اوعى اروح فيها
كرشة: متخافش اخوك ايده ميزان وبعدين ما احنا هنعملوها سوا
حنكش: هاتلى بقى حوارين للمادتين الجايين
كرشة:حوارين ... حواريين ... ما تيجو نذاكرهم وندخل وننجح فيهم ؟
.... لا متنفعش نبقى خالفنا قوانيين الشلة
بص بقولك ايه نطبق برشامتين من الواد صلصة الدحيح
( صلاح الدين اسماه اهله هكذا تيمنا بصلاح الدين وسمى الدحيح لانه متخصص برشمة المناهج )
وعندك حوار احتياطى : اللجنه كانت زيطة والكل بيغش ... وانا الوحيد اللى مغشتش عشان حرام ...
شطبوا على ورقتى ....
حوار تانى احتياطى بردو : ذاكرت وجاوبت والامتحان كان سهل واتظلمت فى التصحيح ...
عاوز اعيد تصحيح ورقتى مظلوم يا ناس .
حنكش: ولما يصححوها يا حلو ....
كرشة: يصححوا مين يا ابويا ... اعادة تصحيح المادة 500 جنيه مين اللى هيدفعهم
هعمل فيها امينه رزق واقولهم هضحى بمستقبلى عشان اوفرلكم
حنكش: الله عليك يا مزاج انت يا عسل . يللا بقى نكمل السهرة والواحد ضميرة مستريح
اخوك طابق 100 جنية مراجعة ليلة الامتحان احنا اولى بيهم .
أكيد يا جماعة فى زى الإتنين دول كتير منقدرش ننكر
بس يا ترى حنكش وامثالهم بيحوروا على اهلهم ولا على نفسهم
وبيظلموا اهلهم ولا نفسهم وايه اخرتها هيفوقوا امتى؟
لما يضيع مستقبلهم ؟ وهيقابلوا ربنا ازاى ؟ اسئلة كتير محتاجة اجابة ...
يا ترى حد هيعرف يجاوب عليها ولا دى كمان محتاجة برشامة ....
موضوع: تعالو نشوف مين حنكش ومين كرشة 